قتلت ولادي
احمد صبري
-
اْه يا وطن مشموم
الظلم فيك بالكوم
والحلم يجي يقوم
الف ضربة تخمده
يلمس نسيم بيعوم
يغرق قسى وهموم
وسط البلد مقسوم
والشر سحر بنجدده
-
رقصة وداع يا سلام
ساكن في برج حمام
طارت سنين واْيام
ماعرفش كسبت إيه
سجن الحياه اْحكام
يا قاضي هات إعدام
يادفاع خسارة الكلام
اْجمل إعتراْف للبيه
-
انا اللي قتلت ولادي
تحية عشان بلادي
الظلم ماليها عادي
مش فاضية لمشاكلي
سامحيني يا مراتي
اْخدت برشام ذبادي
فكرت مزاجو هادي
هيليق على شكلي
-
انا ماْستاهلش اْعيش
علشان شربت حشيش
خدني الشيطان بشويش
خلاني قتلت اْهلي
تسلم يا باشا تعيش
شكرا يا عم الشويش
محبوشة بالتحابيش
ملبوسة وبتندهلي
-
محلاها البدلة الحمرا
واْدي اْخرتها الخمرة
حلوة بلادي السمرا
راية بيضة مرفوعة
عصاية ولا جزرة
المية صبحت عشرة
لسان الحر بره
والرحمة هنا ممنوعة
