بقلمى /رفعت أبوكريّم (شاعر الصعيد)
بعنوان {{ لحد فين هتوصلونا}} (عاميّة)
*************************
لحد فين هتوصلونا
بسكينة تالمة تدبحونا
تحطّوا فينا وتشيلونا
من فوق دماغكم تهبدونا
كرهنا العيشة ف البيوت
واحنا ملّينا السكوت
عايشين حياتنا بالريموت
احنا زهقنا عايزين نموت
نجيب منين ناكل ونشرب؟
والدنيا حوالينا بتخرب
والفقر فينا بكفوفه يضرب
نجرى منه ما نلاقى مهرب
أنا عايز منكم حكيم يقولّى
لحد فين هتوصلونا
عايشين حياتنا بالعوالة
شبعنا كلام كرهنا القوالة
وبعنا عيالنا ف سوق الدلالة
وكمان عرفنا احنا حثالة
غلبنا الهمّ ذبحتنا البطالة
وكل يوم نوكل عيالنا
بلقمة تايهة ف صندوق الزبالة
أنا عايزمنكم عاقل يقولّى
لحد فين هتوصلونا
أنا ماشى تايه ومش بكيفى
ف وسط الطريق ماسك رغيفى
ولا عدت أفرّق بين حضرى وريفى
ما هو غصب عنّى ذبحتّنى ظروفى
أنا عايز منكم عاقل يقولّى
لحد فين هتوصلونا
تحطّونا ف سواقى وتدوخونا
كرهنا عيالنا وهجرنا أخونا
أمانة عليكم إحنا خلاص
ملّينا قرفكم ليه تبهدلونا
حرام عليكم برضه احنا ناس
سبّينا جدودنا ليه يخلّفونا
أمانة يا قاضى لو كنت فاضى
تخلّى بالك لبكره يبيعونا
زى ما باعوا أرضى وعرضى
خلّونا نرضع فقر وسابونا
والدنيا تلف بينا وتهرس
تحلف تقول قواديس الطاحونة
خيرات بلدنا هما خدوها
وإحنا أخيراً أخدنا الصابونة
*********************
رفعت أبوكريّم (شاعر الصعيد)
