بقلم الشاعر أسامة جديانة
حاسس جدران البيت بتموت
لا فيها نفس ولا فيها صوت
حاسس وكأني عايش فى تابوت
لا شايف ناس ولا حتى حانوت
شبابيك وبيبان ساكنه الجدران
ولا حد يمر فيها ولا يفوت
ولا فيها غربان ولا عنكبوت
لكني شامم ريحة الموت
مش لاقي ذكري أشعر بالفرح
مش شايف فيها غير الأحران
كل حاجه فيها ذكري بجرح
وعذاب وأنين ودي ذكري زمان
زرعت بستان أمل طرح
زهور بتبحث عن الأمان
من كتر أنينها صابها القرح
شافت العذاب أشكال والوان
مع أني راويها بكاس الفرح
وسقيتها من قلبي الحنان
بسمع أصوات وكأنها جان
وطلعت العالي مالقيت سطح
مقفول البيت شبابيك وبيبان
بس أنا سامع صوت الجدران
سكرات الموت ألم الأبدان
والقلب نسي الدقات والنبض
أصرخ ياغراب البين كمان
ما خلاص الموت قتل الجدران
زمان البيت حسه فرحان
ضحكات أطفال مفيهاش أحزان
وضيوف مش تايهه عن العنوان
صبحت بيوتنا مقفوله بيبان
ولا فيه أهل ولا جيران
حاسس جدران البيت بتموت
ولا فيها نفس ولا فيها صوت
(((أسامه جديانه)))
