،،،،،،،،(شهر مبارك)،،،،،،،،،،،،
بقلم الشاعر عبدالله السايح
دقي ياطبله وشيلي الباب
صحي النايم والكداب
خلي الكل يقوم يتسحر
صحي ضميرهم بعد غياب
إصحى يا نايم بطل نوم
إحنا وصلنا لشهر الصوم
إحمد واشكر ربك تاني
وأبكي ياعين ربك تواب
صوم والأكل تشوفه بعينك
شوف كام واحد جاع وف دينك
إطعم تطعم ربي يعينك
لو تطعمهم خدت مناب
طهر نفسك بالأسباب
ربك نزل أحلى كتاب
القرآن بيقول لك ديما
المساكين لله أحباب
صدقة بتمنع شر كبير
مال الله عنده التدابير
طهر مالك بالصدقات
عنك تمنع أي عذاب
صحي ضميرك بعد مامات
قطر العمر وله علامات
اشحن قطرك بالحسنات
يبقى ضميرك وحده عتاب
شهر وربك خصك بيه
بالحسنات أضعاف تلاقيه
أوصل رحمك مهما وفيه
خير وتلاقي في وقت حساب
اقرأ ديما في القرآن
عيش الايه بكل كيان
إخشع ديما للديان
إطلب توبتك م التواب
شهر مبارك رمضان جالك
ذكي بمالك على أوصالك
أشكر ربك على أحوالك
رزقك طالك بعد ماطاب
فرصة واوعى تفرط فيها
لو يوم ضاعت فين تلاقيها
فرصه وربك يوم يحصيها
خلي صيامك له وهاب
،،،،،،،،،،،،،،(شعر)،،،،،،،،،،،،،،
عبد الله السايح
