انا مين بقلم الشاعر فيصل بدر

*** أنا مين***
أنا اللى بغزل م الكلام
أحلاه
أنا للكلام
أمَـلُه وكل مُناه
أنا
توبى م الكلمات
أنا المرجع لأى قلب
وسط الكلام تاه
***
أنا ترزى
بفصّـل شجرة ضياء الليل
وبلسم قلب مجروح فات
أنا الراحه
اللى بعد آهات
أنا المادنه
ودير وصليب
أنا الصلوات
***
أنا الطاعه
انا العصيان
أنا مسيحى
وألف ماجوسى نصرانى
أنا كافر
وساكن قلبى ألف ايمان
***
أنا مسلم
أنا صرخة عذاب فى القبر
أنا أجنَّـه فى رحم الكون
أنا لحظة غيام وسكون
أنا أمطار وبرق ورعد
أنا الحكمه وصاحب الوعد
***
أنا الجمله وانا الكلمات
أنا رمضان ووقفة عيد
أنا عرفات
***
أنا حاير       أنا داير
أنا تعبان          أنا الإنسان
***
أنا الأفراح وانا الأحزان
أنا الذكرى على الجدران
وانا النسيان
أنا الزابور وانا الإنجيل
أنا القرآن
***
أنا اللى بعالج المرضى
وانا القِدّيس
أنا الأزهر وألف أدان
أنا إبليس
***
أنا الشاعر وانا المطرب
وانا الألحان
أنا الرسّـام وانا النحّات
أنا الفنان
أنا اللى بَـعَـمّـر الصحرا
وانا اللى بدمّـر الأكوان
أنا اللى بحقق الأحلام
وانا اللى بَـغَـيّـر الأحزان
أنا المخطوط فى قلب كتاب
وانا النسيان
***
يا معْـشر البشر
لولايا  ماصعدتوا للقمر
لولايا   ما عرفتوا  ولا خبر
أنا اللى بوزع الأفراح
وانا اللى بوضح القَـدر
***
يا أُمَّـة الإيمان
أنا شمشون
أنا الفارس وخُـط الكون
وانا اللى بنظم الأعمال
وافُـك الجان
***
أنا المكتوب
وانا الغالب وانا المغلوب
أنا اللى بَـخُـش أى قلوب
بِتِـهْـوانى
وغضبى شديد
على اللى فى يوم
يحاول لحظه ينسانى
***
أنا المتعه وباب القبر
أنا المجرم وانا السجّـان
أنا فيصل وانا آدم
أنا الإنسان
****

شاعرالقريه
فيصل بدر