#شايفة
٠٠٠٠٠٠٠٠٠٠٠٠
شايفة ياحبيبتى القمر
يشبه عيونك ف السهر
شايفة الشمس وضيائها
ربك عشانك خلقها
مش عشان كل البشر
شايفة دموعى الحيارى
جوة عينيا السهارى
حاسه القلب وحنينه
وقت البعد بجدارة
شايفة الليل الطويل
زى جذوع النخيل
شايفة الجرح اللى ساكن
جوة القلب العليل
شايفة الدمع اللى جارح
جفن عينيا الحزين
شايفة الحب اللى طارح
جوة عنيكى اليقين
شايفة الدنيا اللى كانت
لينا أحلام من دهب
أصبحت دمع ف عنينا
يجرح جفوننا بدون سبب
شايفة أيامنا اللى ضاعت
ف حبنا من غير حساب
شايفة ليالينا اللى باعت
دمعنا برخص التراب
شايفة والا مابتشوفيش
من غيرك مااقدرش اعيش
من غيرك ايامى تبقى
حزمة عذاب ماتنتهيش
انا بيكى بصبح أمل
وحلم يتحدى الزمان
يتحقق بعد العمل
وينشر الخير والأمان
اوعى من غير اى حق
تعلنى وداعك وهجرك
وابقى ف البعد أشتياق
وانتى تبقى ف دمع سهرك
ليه تخلى الحب بينا
وداع وهجر
ليه تخلى القلب يشعر
ف البعاد بعذاب ومر
وابقى مجروح مرتين
مرة من بعدك ومرة
قطعك الحبل المتين
حبل الوصل اللى بينا
اللى خلا حياتنا جنة
لو انقطع ...
حياتنا تتحول لنار
ماتطفيش ايام زمانا
بقلمى/ هانى السيد
من وحى اللحظة
